Við Pierre sigldum til Hesteyrar frá Ísafirði 16. júlí og vorum komnir þangað kl. 15.15. Eftir smá skoðunarferð um svæðið var haldið af stað og stefnan sett á Sléttuheiði. Við tókum smá krók niður að Sléttu og lendum í basli við að komast í gegnum hvönnina, en héldum svo aftur upp á heiðina að Stað í Aðalvík. Þangað vorum við komnir kl. 20.30. Laugardaginn 17. júlí var messa í Staðarkirkju og ball í skólanum um kvöldið. Á sunnudeginum héldum við upp á Darra og skoðuðum leifar af radarstöð Breta sem nefnd var HMS Baldur. Við gengum svo eftir Lækjarfjalli og komum niður í Staðardal. Á mánudeginum gengum við inn Þverdal, upp á Litlafell, út á Hvarfanúp og út á Nasa. Þriðjudagurinn var svo heimferðadagur.