Skundi fór í gönguferð um Hornstrandir í ágúst 2010. Fyrsta daginn var siglt frá Bolungarvík yfir á Sæból í Aðalvík. Þar var gengið að Staðarkirkju og hún skoðuð. Þá var haldið áfram upp á Sléttuheiði og niður að Hesteyri, þar sem hópurinn gisti í Læknishúsinu. Á öðrum degi var gengið inn að Stekkeyri þar sem áður var hvalstöð og seinna síldarstöð. Eftir að hafa skoðað rústirnar var haldið til baka á Hesteyri og svo gengið til Látra í Aðalvík um Hesteyrarskarð. Á Látrum var tjöldum slegið upp. Á þriðja degi var haldið yfir Tunguheiði og niður í Fljótavík, farið var inn fyrir Fljótsvatn og slegið upp tjöldum við Reiðá. Á fjórða degi var haldið upp í Þorleifsskarð, út á Almenninga vestri í Almenningaskarð og þaðan niður í Kjaransvík, fyrir Álfsfell að Búðum í Hlöðuvík þar sem gist var í Búðarbæ. Á fimmta degi hélt hópurinn upp Skálakamb í Atlaskarð, þaðan var farið niður í Rekavík bak Höfn, yfir Tröllakamb í Hornvík þar sem gist var í Stígshúsi á Horni. Frá Stígshúsi var haldið í göngur, farið var í fjöruferð að Hornskletti, upp á Hornbjarg, Miðfell niður í Mðdal og upp í Múla. Á áttunda degi var komið að heimferð. Leiðindaveður var á heimferðardegi og ekki reyndist unnt að sækja hópinn í Hornvík og varð að bregða á það ráða að ganga yfir í Veiðileysufjörð. Þessa átta daga voru gengnir u.þ.b. 103 km á tæpum 55 klst. Milli náttstaða voru yfirleitt gengnir 13-16 km á 7-10 klst. Veður var sæmilegt til göngu, einstaka sinnum ringdi á hópinn, en ekki alvarlega.