Eftir að hafa rápað um Hornstrandir var stefnan sett á Fimmvörðuháls. Ég fór með Pierre af stað 20. ágúst. Við tókum rútu í Húsadal, en það var stoppað við Gígjökul. Við gengum fyrst að Sönghelli, héldum svo upp á Valahnúk, næst niður í Langadal og svo í Bása. Á öðrum degi fórum við í alla afkima Stakkholtsgjár og fundum þar tvo fossa, vel falda. Á bakaleið fórum við útidúr inn Hvannárgil, snerum við eftir að við vorum komnir í algjörar ófærur. Við fórum upp úr Hvannárgili upp á Vestrihatt og tókum nokkrar myndir.

Á þriðja degi var farið upp á Fimmvörðuháls. Veður var sæmilegt megnið af leiðinni. Við fórum um Morinsheiði og tókum myndir og héldum svo beina leið áfram. Við lendum í smá vandræðum með að komast að skálanum og þurftum að vaða smá á sem er tekin að myndast þegar líður á daginn. Fljótlega eftir að í skálann var komið fór að rigna og rigna og rigna. Ekkert varð að gönguferð á jökul eða um nágrenni skálans. Við fórum með Uwe skálaverði í "vatnstöku" - þ.e. við náðum í jökul til að þíða á eldavélinni. Skálinn var ágætur.

Á fjórða degi var haldið að af stað niður í Skóga. Það var grenjandi rigning allan tímann. Þegar niður var komið biðum við í nokkurn tíma eftir rútunni sem fór með okkur í bæinn.