Fór þann 15. apríl með Útivist frá Gjábakka að Laugarvatni. Þetta var fjórði hlutinn í göngunni eftir Kóngsveginum. Við löbbuðum mest megnis eftir núverandi veg, en Kóngsveginn mátti sjá hér og þar beggja vegna hans. Við löbbuðum þó eftir Kóngsveginum þar sem hann var ekki drullusvað. Veðrið var lala, ekki of kalt, en gekk á með skúrum og élum. Við áðum fyrst rétt við veginn í Reyðarbarmshrauni, en þar fundum við smá laut. Skammt frá er Tintron um 20 metra djúpur hraunhellir og fleiri hella má finna á leiðinni frá Gjábakka. Frá Reyðarbarmi lá leiðin um Barmaskarð niður á Laugarvatnsvelli. Við áðum svo aftur skömmu seinna í Lagavantshellum, en þeir eru neðst í brekkunni upp af völlunum austan undir Reyðarbarmi. Í nokkur ár upp úr 1910 var búið í þeim og munu hafa fæðst þar tvær konur. Sonur annarar þeirra, Einar, var með í för. Hellarnir voru tveir, og hægt að komast á milli þeirra, voru kýr í öðrum, miðstöðvarhiting þess tíma. Framan við hellana var sett þil eins og var á torfhúsum. Vegalengdin skv. GPS tækinu mínu var 18,5 km. Mesta hækkun var 160 m. Þetta labb tók okkur 5 klukkustundir og 11 mínútur! Við lukum ferðinni í söluskálanum Bláskógar og fengum ís þar.

Fararstjóri var Sigurður Jóhannsson.