Ég fór með Útivist í göngu númer 2 í Hvalfirðinum. Við gengum frá Hrískoti inn Brynjudalinn yfir Selflatir og kíktum inn Þrengslin. Næst hækkuðum okkur aðeins og settumst niður i nestispásu. Svo var haldið aðeins til baka til að mynda foss í Þórisgili. Þegar við héldum áfram upp varð einn göngumanna fyrir óláni að missa fótana rétt áður en hann náði upp úr brattanum, hann rann og rúllaði niður einhverja tugi metra áður en hann náði að stoppa sig. Svo stóð hann upp og hélt áfram göngunni. Þegar upp var komið héldum við að ánni og fundum einn eða tvo fossa þar. Þegar að Stóra-Botni var komið settum við stefnuna á Þvottahelli. Þar mun hafa verið þurrkaður þvottur í ótíð. Að lokum var haldið niður að veginum og honum fylgt þar til við hittum Sæmund við Litla-Botnsdal.

Við gengum 13,8 kílómetra á rúmum fimm og hálfum tíma.