Laugardaginn 16. júní fór ég Leggjabrjót með Útivist. Lagt var af stað kl. 20.00 (átta að kveldi) frá BSÍ. Sæmundur fór með okkur á Þingvelli þar sem uppganga hófst, um 21.15. Sautjándi júní rann svo upp eftir 6,3 kílómetra göngu og Pétur kallaði yfir hópinn "Hæ hó, jibbíjæ, jibbijei, það er kominn sautjándi júní". Að sjálfsögðu var grenjandi rigning á þeirri stund. Veðrið var ekki alveg það besta. Þoka framan af, skúrir bleyta og leiðinlegt. En eftir því sem leið á sautjánda þá varð veðrið skárra, þokkunni létti, rigningin hvarf og það birti til. Hópurinn var fjölmennur, tvær stórar rútur. Ferðin gekk vel. Á Leggjabrjót var þokan mest og fararstjórar stöðvuðu gönguna þegar ein varðan reyndist stórt grjót. Á meðan fararstjórarnir báru saman bækur sínar, kort og GPS tæki létti þokunni skyndilega og við blasti við ágætis útsýni yfir að Sandvatni. Ferðin var hin ánægjulegasta, ég prófaði nýjan bakpoka og var sæll og glaður hvað bakið á mér var þurrt. Þegar upp í rútu var komið var maður hálfsofandi, ég var kominn heim til mín um sexleitið þann 17. júní, fór í sturtu og svo upp í rúm!!! Ég gekk 18,1 kílómetra á rúmum sex og hálfum tíma. Er ég nú búinn að labba 105 klukkustundir það sem af er ári með Útivist og Ferðafélagi Ísland. Hækkunin var 340 metrar.